प्रवासी नेपाली मञ्च कुवेत राष्ट्रिय कमिटीको सम्मेलन सम्पन्न

काठमाडौं । प्रवासी नेपाली मञ्च कुवेत राष्ट्रिय कमिटीको चौथो राष्ट्रिय सम्मेलन कुवेत सिटीमा सम्पन्न भएको छ ।

शनिबार आयोजित सम्मेलनको उद्घाटन नेकपा एमाले स्थाई कमिटीका सदस्य, प्रवास इन्चार्ज तथा परराष्ट्र मामिला विभाग प्रमुख राजन भट्टराईले गरेका थिए ।

सो सम्मेलनले रुपेन विक्रम हमालको नेतृत्वमा कुवेत राष्टिय कमिटीको चयन गरेको छ ।

नेपाली पञ्चैबाजा र नेपालका कलाकारहरुको प्रस्तुतीसहित आयोजना गरिएको उद्घाटन समारोहलाई सम्बोधन गर्दै नेता भट्टराईले सम्मेलन सफलताको शुभकामना दिनुका साथै नेकपा एमालेका अध्यक्षको नेतृत्वमा बनेको वर्तमान सरकारले मुलुकमा राजनीतिक स्थायित्व कायम गर्ने, अर्थतन्त्रलाई सकारात्मक दिशामा चलायमान बनाउने र सुशासनको प्रत्याभूति दिलाउन लाग्ने बताए ।

प्रवासमा काम गर्ने श्रमिकहरुको हितमा वर्तमान सरकारले प्राथमिकताका साथ काम गर्ने र श्रमिकको हक, हित र सुरक्षाका लागि देशको कानुन र नीतिमा अवश्यकता अनुसार परिवर्तन गर्ने र कुवेत लगायत विभिन्न मुलुकहरुसँग श्रम सम्झौताका लागि पहल गर्नेछ भनी विश्वास दिलाए ।

उक्त समारोहलाई कुवेतका लागि नेपाली राजदुत घनश्याम लम्साल, प्रवासी नेपाली मञ्च अन्तर्राष्ट्रिय कमिटीका अध्यक्ष संजय थापा, कुवेतस्थित विभिन्न संघ संस्थाका प्रतिनिधिहरुले शुभकामना मन्तव्य दिएका थिए। नेपाली श्रमिकहरुको उल्लेख्य उपस्थिति रहेको सो समारोहमा सहयोगी संघ संस्थाका प्रतिनिधिहरुलाई प्रशंसा पत्र वितरण गरिएको थियो ।