काठमाडौं। नेपाली राष्ट्रिय क्रिकेट टोलीका प्रशिक्षक मोन्टी देसाईले दक्षिण अफ्रिकासँगको हारलाई स्वीकार गर्न गाह्रो भइरहेको भएपनि गतिलो छाप छाड्न सफल भएको बताएका छन्।

जारी टी–२० विश्वकपको पहिलो चरणअन्तर्गत बंगलादेशसँग सोमबार बिहान हुने खेलअघि आयोजित प्रि म्याच कन्फेरेन्समा उनले हार ब्यहोर्ने टिमलाई असफल भनिने गरेपनि कहिल्यै हराउन नसकेको दक्षिण अफ्रिकाविरुद्ध नेपालले ‘फुटप्रिन्ट’ छाडेको बताए।

‘हामीले टेस्ट राष्ट्रलाई हामी पनि यो खेलका हौँ भन्ने बुझाएका छौँ’, उनले भने।

नेपाल शनिबार बिहान भएको खेलमा १ रनले पराजित भएपछि सुपर एट पुग्ने सम्भावना समाप्त भएको थियो।

अन्तिम समयमा ब्याट्सम्यानहरु सम्हालिन नसक्दा नेपालले पहिलोपटक टेस्ट राष्ट्रलाई हराउने अवसर गुमाएको हो। प्रशिक्षक देसाईले नेपालले ‘मेन्टल स्ट्रेन्थ’ देखाउन आवश्यक भएको पनि बताए।