काठमाडौं । नेकपा एकीकृत समाजवादीका अध्यक्ष माधव नेपाल स्वदेश फर्किएका छन् । यही भदौ १६ गते रुस प्रस्थान गरेका नेपाल शनिबार दिउँसो काठमाडौं ओर्लिएका हुन् ।

मल्टी पोलारिटी फोरम विषयक अन्तर्राष्ट्रिय सम्मेलनमा भाग लिन नेपाल रुस गएका थिए । सम्मेलन सेप्टेम्बर ३ देखि ६ तारिखसम्म चलेको थियो । साथै अध्यक्ष नेपालले साउथ एसियन इकोनोमिक फोरमको समूहगत छलफलमा पनि भाग लिएका थिए ।

रुसमा सम्पन्न कम्युनिष्ट नेताहरुको बैठकमा भाग लिन पुगेका अध्यक्ष नेपालले चीन, रुसलगायत देशका कम्युनिष्ट नेताहरुबीचको बैठकमासमेत भाग लिएका थिए ।

स्वदेश फर्किएपछि अध्यक्ष नेपालले आफूलाई स्वागत गर्न पुगेका नेता तथा कार्यकर्तालाई आफ्नो भ्रमण सफल भएको बताए ।

भ्रमणबाट नेपालको पहिचान तथा विशेषतालाई अन्तर्राष्ट्रिय जगतसम्म पुर्‍याउन र समाजवादी तथा कम्युनिष्ट पार्टीहरूबीच आफ्नो पार्टीको सम्बन्ध विस्तार गर्न सहयोग पुगेको उनले सुनाए ।

अध्यक्ष नेपाल स्वदेश फर्किएसँगै पार्टीका विभिन्न केन्द्रीय विभाग, इन्चार्जसहितको जिम्मेवारी तोकिने तयारी रहेको उपाध्यक्ष जगन्नाथ खतिवडाले बताए ।

नेकपा एसले हालैमात्र निर्वाचन प्रक्रियाबाट पदाधिकारी र पोलिटब्युरोलाई पूर्णता दिएको थियो । पार्टीका सबै कमिटीले पूर्णता पाएपछि अब बैठक राखेर नेताहरुलाई जिम्मेवारी दिने नेकपा एसको तयारी छ ।