आज कोशी र गण्डकी प्रदेशका केही ठाउँमा सामान्य वर्षाको सम्भावना

काठमाडौँ । आज दिउँसो कोशी र गण्डकी प्रदेशको पहाडी भेगका केही ठाउँमा सामान्य वर्षाको सम्भावना रहेको मौसम पूर्वानुमान् महाशाखाले जनाएको छ ।

पश्चिमी वायुसहित पहाडी भू–भागमा स्थानीय वायुको सामान्य प्रभाव रहेकाले केही ठाउँमा बदलीसहित सामान्य वर्षाको सम्भावना रहेको महाशाखाको बुलेटिनमा उल्लेख छ । बाँकी ठाउँको मौसम सामान्यतया सफा रहनेछ । अहिले पहाडी भू–भागका केही ठाउँमा बदली र तराईका केही ठाउँमा हुस्सु लागेको छ । बाँकी ठाउँको मौसम सफा छ ।

यसैबीच आज पनि काठमाडौँ उपत्यका सहितका शहरी क्षेत्र र तराईको वायु प्रदुषण उच्च रहेको छ । हिजोको तुलनामा केही कम भए पनि प्रदुषण उच्च रहेको वातावरण विभाग अन्तर्गतका मापन केन्द्रहरुले जनाएका छन् ।