पूर्वउपराष्ट्रपति पुनलाई फेरि माओवादीमा सेटल गर्ने तयारी, जिम्मेवारीबारे ‘होमवर्क’ जारी

काठमाडौं । नेकपा माआवादी केन्द्रका अध्यक्ष पुष्पकमल दाहाल ‘प्रचण्ड’ ले दुई कार्यकाल उपराष्ट्रपति भएका नन्दबहादुर पुन ‘पासाङ’ उपाध्यक्षको जिम्मेवारी दिएर सक्रिय राजनीतिमा फर्काउने तयारी थालेका छन् ।

गत साता अध्यक्ष प्रचण्ड निवास खुमलटारमा बसेको पदाधिकारी बैठकमा सहभागी भइसकेका पुनलाई प्रचण्डले उपाध्यक्ष बनाउने बनाउन लागेको स्रोतको भनाइ छ ।

जनयुद्धकालदेखि नै प्रचण्डनिकट रहेका पुन अहिले प्रचण्डको जोडबलमै सक्रिय राजतीतिमा फर्किन तयारी भएको बताइन्छ । उपराष्ट्रपतिबाट बिदा भएपछि राज्यबाट कुनै सेवा सुविधा नलिएको भएकाले प्रचण्डले पुनलाई सक्रिय राजनीतिमा आउन सुझाएका हुन् ।

गत साता खुमलटारमा बसेको बैठकमा पुनको विषयमा छलफल भएपनि जिम्मेवारीबारे कुनै निर्णय नभएको सचिव दिनानाथ शर्माले बताएका थिए ।

उनले भनेका थिए, ‘उहाँले पार्टीको जिम्मेवार मान्छे हुनुहुन्थ्यो, पार्टीले पठाएर गएको हो, राज्यको तर्फबाट कुनै सेवा सुविधा नलिएको भए पछि राजनीतिमा फर्किन चाहनुहुन्छ भने त्यही अनुसार पार्टीको पुस २ गते बस्ने केन्द्रीय कमिटीको आवश्यक निर्णय लिन्छ ।’

माओवादीका सचिव गणेश साहले पनि पुन सक्रिय राजनीतिमा आउनेबारे छलफल भएपछि पद र जिम्मेवारीको विषयमा कुनै निर्णय नभएको बताए ।

उनले भने, ‘उहाँ सक्रिय राजनीतिमा आउने विषयमा छलफल भएको हो । तर, उहाँको जिम्मेवारीको विषयमा कुनै निर्णय भएको छैन ।’

तर, अर्का एक पदाधिकारीले अध्यक्ष प्रचण्डले पुनलाई उपाध्यक्ष बनाउने तयारी गरिरहेको दाबी गरे ।’

उनले भने, ‘आज बैठक बस्ने तयारी थियो । बस्न सकेन, बसेको यो विषयमा उठ्थ्यो होला । अब भोलि बस्ने भनिएको छ । अहिलेसम्म पार्टीमा त छलफल भएको छैन । अब अध्यक्षले उपाध्यक्ष बनाएर कुनै प्रदेशको जिम्मेवारी दिने तयारी गरेको बुझेका छौं ।

ती नेताका अनुसार अहिले छलफल भएपनि निर्णय केन्द्रीय समितिको बैठकबाट मात्रै हुनसक्ने सुनाए ।

ती नेताले थपे, ‘हाम्रो पार्टीमा पद छ, तर जिम्मेवारी छैन । अहिले भएका उपाध्यक्षहरू पनि व्यवस्थापनको लागि मात्रै भएको जस्तो देखिएको छ । कुनै जिम्मेवारी तोकेको छैन । अब केन्द्रीय कमिटी बैठकबाट पार्टीलाई अध्यक्षले नयाँ ढंगले अघि बढाउने भन्नुभएको छ, हेरौं ।’

यसअघि माओवादीले सभामुख भएर कार्यकाल सकिएर सक्रिय राजनीतिमा आएका अग्निप्रसाद सापकोटालाई पनि उपाध्यक्ष बनाएको थियो । उनलाई अहिले प्रवक्ताको जिम्मेवारी दिइएको छ ।

अहिले माओवादीमा वरिष्ठसहित ४ उपाध्यक्ष छन् । वरिष्ठ उपाध्यक्षमा नारायणकाजी श्रेष्ठ, उपाध्यक्षमा कृष्णबहादुर महरा, अग्नि सापकोटा र पम्फा भुसाल । जसमध्ये महरा पछिल्लो समय सक्रिय राजनीतिमा छैनन् ।

पार्टी अध्यक्ष नेतृत्वको सरकार भएको बेलामा सुन तस्करी प्रकरणमा पक्राउ परेर हाजिर जमानीमा छुटेपछि सक्रिय छैनन् । पछिल्लो सयम अस्वस्थ रहेका महरा पार्टीको बैठकमा पनि आउन छाडेका छन् ।

त्यसो त माओवादीमा पछिल्लो समय विधानले व्यवस्था गरेको भन्दै धेरै पदाधिकारी बनाएको भन्दै उपमहासचिव जनार्दश शर्मा, हरिबोल गजुरेललगायतका नेताहरूले असन्तुष्टि जनाएका थिए ।