काठमाडौं । सर्वोच्च अदालतले नेपाल प्रहरीका पूर्व डीआईजी छविलाल जोशीलाई पुर्पक्षका लागि थुनामा पठाउने आदेशको कैफियत प्रतिवेदन मगाउने आदेश गरेको छ ।

आज (मंगलबार) न्यायाधीश विनोद शर्माको इजलासले यस्तो आदेश गरेको हो । बुटबलको सुप्रिम सहकारी ठगी प्रकरणमा जोशीलाई जिल्ला अदालतले रूपन्देहीले पुर्पक्षका लागि थुनामा पठाएको थियो ।

जोशी जिल्ला अदालतको आदेशविरुद्ध उच्च अदालत गएका थिए । उच्च अदालत तुलसीपुर, बुटवल इजलासले पनि जिल्ला अदालकै फैसला सदर गरेपछि उनी सर्वोच्च आएका थिए ।

आफूलाई थुनामा पठाउने आदेशमा त्रुटीरहेको जिकिरसहित उनी सर्वोच्च पुगेका हुन् । मुलुकी फौजदारी कार्यविधि संहिता–२०७४ को दफा ७३ मा थुनछेक वा तोकिएको धरौट, जमानत वा बैंक जमानतमा चित्त नबुझ्ने पक्षले एक तहसम्म पुनरावेदन सुन्ने अदालतमा निवेदन गर्न सक्ने व्यवस्था रहेको छ । सुप्रिम सहकारी ठगी प्रकरणमा पक्राउ परेयता जोशी थुनामै छन् ।