काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईं शुक्रबार निर्वाधरूपमा कार्यालय पुगेका छन् । उनी आज कार्यालय समयमै कुनै अवरोधबिना कार्यालय प्रवेश गरेका हुन् ।

प्रमुख प्रशासकीय अधिृकत गुरागाईंले रोकिएका कर्मचारीको तलबका लागि तोक लगाइदिएका छन् । शुक्रबार कार्यालय समय सुरु हुनासाथ गुरागाईंले कर्मचारीको तलबका लागि तोक लगाइदिएका हुन् ।

उनका अनुसार, प्रमुख प्रशासकीय अधिकृत आएसँगै कर्मचारीको खातामा तलब पठाउने प्रक्रिया अघि बढिसकेको छ । सोमबारसम्म सबै कर्मचारीको खातामा तलब पठाउने तयारी भएको उनको भनाइ छ ।

कर्मचारीको खातामा तलब पठाउन तीन महिनादेखि थन्किएका फाइल खोल्न थालिएको प्रवक्ता नवीन मानन्धर बताउँछन् ।

महानगरमा शिक्षकसहित तीनहजार ६०० बढी कर्मचारी छन् । उनीहरूमध्ये शिक्षकले पाँच महिनादेखि तलब पाएका छैनन् । जनप्रतिनिधि र कर्मचारीले तीन महिनादेखि तलब पाएका छैनन् ।

उनी हाजिर गर्न पुगेलगत्तै महानगरमा केहीबेर तनाव भएको थियो । उनलाई रोक्न महानगर प्रहरी समेत खटाइएको थियो ।

तर, कर्मचारीहरूले उनलाई रोक्न नदिँदै र्काकक्षसम्म पुर्‍याएका थिए । गत पुस ७ गतेदेखि गुरागाईंलाई बिदामा राखिएको थियो ।