काभा वुमन्स नेसन्स लिग आजदेखि, श्रीलंकासँग खेल्दै नेपाल

काठमाडौं । काभा वुमन्स नेसन्स लिग भलिबल आजदेखि काठमाडौंमा सुरु हुँदैछ । मध्य एसियाका क्याटेगोरी ए र क्याटेगोरीका बी का पाँच टोलीले यस प्रतियोगितामा प्रतिस्पर्धा गर्नेछन् ।

प्रतियोगिताको उद्घाटन खेलमा आज घरेलु टोली नेपालले श्रीलंकासँग खेल्दैछ । खेल त्रिपुरेश्वरस्थित राखेपको कभर्डहलमा दिउँसो सवा ३ बजे सुरु हुनेछ ।

एक सातासम्म सञ्चालन हुने प्रतियोगितामा नेपाल र श्रीलंकासहित इरान, भारत र माल्दिभ्सले प्रतिस्पर्धा गर्दै छन् । आजै हुने अर्को खेलमा भारत र इरान प्रतिस्पर्धामा उत्रनेछन् ।

प्रतियोगिताको तयारीका निम्ति नेपालले यसअघि रुसी टिमसँग दुई मैत्रीपूर्ण भलिबल खेलेको थियो । तर, उक्त दुवै खेलमा नेपाल सोझो सेटमा पराजित भएको थियो ।