काठमाडौं । बलिउड अभिनेता सैफ अली खानलाई छुरा प्रहार गर्ने व्यक्ति बंगलादेशी नागरिक हुनसक्ने मुम्बई प्रहरीले जनाएको छ । सैफमाथि भएको आक्रमणबारे मुम्बई पुलिसले आज बिहान पत्रकार सम्मेलन गर्दै आरोपीबारे जानकारी दिएको हो । 

उनी चोरी गर्ने उद्देश्यले शैफको घरमा पसेको प्रहरीले बताएको छ । बलिउड अभिनेता सैफको बान्द्रास्थित आफ्नै घरमा बिहीबार बिहान उनीमाथि छुरा प्रहार भएको थियो । त्यसपछि उनलाई लीलावती अस्पतालमा भर्ना गरिएको छ ।

डाक्टरहरूले सैफको मेरुदण्डबाट साढे दुई इन्च लामो छुरा निकालिएको बताएका थिए । 

प्रहरीका अनुसार अभियुक्तले सेफअलीको घरमा पस्नका लागि आगलागीका लागि प्रयोग हुने भवनका सिँढीहरू प्रयोग गरेका थिए। सुरुमा सैफका कान्छा छोराको कोठामा जान लाग्दा घरमा सहयोगी रहेकी नर्सले रोक्न खोज्दा उनीमाथि छुरा प्रहार भएको थियो। 

होहल्ला मच्चिएपछि सैफले उनलाई रोक्न खोज्दा एक करोड माग गरेका थिए। दिन मनाही गरेपछि छुरा प्रहार भएको थियो।