शनिबार १९ फाल्गुण २०८०
समाज

अरुण चौधरीबारे आदेश दिने न्यायाधीशलाई मुगु सरुवा

सोमबार माघ २९, २०८०/ Monday 02-12-24

काठमाडौं । काठमाडौं जिल्ला अदालतका न्यायाधीश यज्ञप्रसाद आचार्यलाई मुगु सरुवा गरिएको छ ।

न्यायाधीश आचार्यको मुगु जिल्ला अदालतमा काज सरूवा भएको सर्वोच्च अदालतका प्रवक्ता वेदप्रसाद उप्रेतीले जानकारी दिए।

न्यायाधीशहरूको सरूवा न्यायपरिषदले गर्ने व्यवस्था भएपनि काज सरूवा भने प्रधानन्यायाधीशले गर्न पाउँछन्।

बाँसबारी छालाजुत्ता कारखानाको जग्गा च्याम्पिएन फुटवेरका नाममा सारी गैरकानुनी लाभ लिएको आरोपमा पक्राउ परेका व्यवसायी अरुण चौधरीको म्याद थपका विषयमा उनले दिनभर बहस गराएर दुई दिनमा अनुसन्धान नसके स्वतः रिहा हुने आदेश दिएका थिए ।

म्याद थपका निम्ति अदालतमा उपस्थित गराइएका चौधरीका विषयमा अन्तरिमजस्तै आदेश दिइएको थियो । त्यसपछि न्यायाधीश आचार्यबारे प्रश्न उठाइएको थियो ।

न्याय प्रशासनको नेतृत्वकर्ता प्रधानन्यायाधीश विश्वम्भरप्रसाद श्रेष्ठले आइतबार (हिजो) उनलाई मुगु काज सरुवा गरिदिएका स्रोतले जानकारी दियो ।

तपाईको प्रतिक्रिया