काठमाडाै‌‌।  राष्ट्रिय वाणिज्य बैंकले नजिकिँदै गरेको चाडपर्वलाई ध्यानमा राखेर एक योजना सार्वजनिक गरेको छ । 

बैंकले स्थिर ब्याजदरमै गाडी कर्जा उपलब्ध गराउने योजना सार्वजनिक गरेको हो । बैंकले ७ वर्षसम्मका लागि स्थिर ब्याजदरमा कर्जा कर्जा उपलब्ध गराउने योजना ल्याएको बैंकले जनाइएको छ ।

बैंकले उक्त योजनाको नाम ‘आरविवि भेहिकल लोन फेस्टिभल अफर’ दिएको छ । अफर अन्तर्गत बैंक ७.७७ प्रतिशतको स्थिर ब्याजदरमै गाडी खरिदका लागि ऋण उपलब्ध गराउने छ ।

मासिक किस्ताबन्दीमा कर्जा भुक्तानी गर्ने गरी बैंकले अधिकतम एक करोड रुपैंयासम्म कर्जा लगानी गर्ने जनाइएको छ । कर्जा रकमको ०.५० प्रतिशत सेवा शुल्क लाग्ने बैंकले जनाएको छ ।

गाडीको कोटेसनमा अंकित मूल्यको विद्युतीय गाडी (इभी) को हकमा बढीमा ८० प्रतिशत र पेट्रोलरडिजेल गाडीको हकमा बढीमा ५० प्रतिशतसम्म बैंकले कर्जा लगानी गर्ने छ ।

बढीमा ७ वर्षसम्म कर्जा अवधि दिइने यो योजना भदौ १ देखि कात्तिक मसान्तसम्म मात्र लागु हुने बैंकले जनाएको छ ।

यो योजनाअन्तर्गत कर्जा लिएका ग्राहकको कर्जा अवधिभरि ब्याजदर परिवर्तन हुने छैन । निवेदन दिएको ७ कार्य दिनभित्रमा निर्णय दिने यस योजनामा गाडी कर्जासम्बन्धी अन्य प्रचलित नियमहरू आकर्षित हुने बैंकले स्पष्ट पारेको छ । यो कर्जा बैंकका सम्पूर्ण शाखा कार्यालयहरूबाट लिन सकिने बैंकले जनाएको छ ।