काठमाडौं । पोखरा महानगरपालिकाले आगामी आर्थिक वर्षका लागि ७ अर्ब १५ करोड रुपैयाँको बजेट सार्वजनिक गरेको छ। शुक्रबार आयोजित नगरसभामा उपमेयर मञ्जुदेवी गुरुङले बजेट प्रस्तुत गरेकी हुन्।

प्रस्तावित बजेटमध्ये करिब ५५ प्रतिशत रकम पुँजीगत खर्चका लागि विनियोजन गरिएको छ भने बाँकी ४५ प्रतिशत चालू खर्चतर्फ छुट्याइएको छ।

महानगरले आगामी वर्ष संघीय सरकारबाट सशर्त अनुदानअन्तर्गत २ अर्ब ६१ करोड रुपैयाँ प्राप्त गर्ने अनुमान गरेको छ। त्यस्तै विशेष अनुदानमा ५ करोड ५० लाख, समपुरक अनुदानमा १ करोड ८२ लाख तथा समानीकरण अनुदानमा ४९ करोड ३७ लाख रुपैयाँ प्राप्त हुने प्रक्षेपण गरिएको छ। वित्तीय हस्तान्तरणमार्फत मात्रै ३ अर्ब १८ करोड रुपैयाँ आउने अपेक्षा गरिएको छ।

प्रदेश सरकारबाट पनि विभिन्न शीर्षकमा अनुदान प्राप्त हुने अनुमान छ। समपुरक अनुदानतर्फ ६० लाख, विशेष अनुदानतर्फ ४० लाख, समानीकरण अनुदानमा ८ करोड १५ लाख र वित्तीय हस्तान्तरणमार्फत ९ करोड १५ लाख रुपैयाँ प्राप्त हुने महानगरले जनाएको छ।

यसका अतिरिक्त संघीय राजस्व बाँडफाँटबाट ३४ करोड ३४ लाख र प्रदेश राजस्व बाँडफाँटबाट ४ करोड ९ लाख रुपैयाँ प्राप्त हुने अपेक्षा गरिएको छ। स्थानीय राजस्व बाँडफाँटबाट १ अर्ब ३१ लाख तथा आन्तरिक स्रोतबाट २ अर्ब ४८ करोड ७३ लाख रुपैयाँ संकलन गर्ने लक्ष्य राखिएको छ।

बजेटअन्तर्गत वडा कार्यालयमार्फत सञ्चालन हुने विकास तथा सेवा सम्बन्धी योजनाका लागि ७२ करोड ४० लाख रुपैयाँ विनियोजन गरिएको छ।