दुबई । दुबईस्थित अमेरिकी दूतावासमा आज आक्रमण भएको समाचार सार्वजनिक भएको छ। विस्फोटपछि दूतावास परिसर आसपास धुवाँ देखिएको जनाइएको छ। प्रारम्भिक विवरणअनुसार कूटनीतिक कर्मचारीहरू सुरक्षित रहेका छन् भने क्षतिको पूर्ण विवरण आउन बाँकी रहेको बताइएको छ।

यसैबीच इजरायलले तेहरानमा हवाई आक्रमण तीव्र पारेको जनाएको छ। इजरायली पक्षले इरानका सैन्य संरचना र रणनीतिक लक्ष्यहरूमा प्रहार गरिएको दाबी गरेको छ। राजधानीका विभिन्न भागमा शक्तिशाली विस्फोटको आवाज सुनिएको स्थानीय स्रोतहरूले उल्लेख गरेका छन्।

उता इरानले इजरायलको कारबाहीको कडा निन्दा गर्दै आवश्यक परे प्रतिकार गर्ने चेतावनी दिएको छ। दुवै पक्षबीच क्षेप्यास्त्र र मानवरहित विमानमार्फत आक्रमण आदान–प्रदान भइरहेकाले क्षेत्रीय सुरक्षा अवस्था झन् जटिल बनेको छ।

त्यसैगरी बेरूतमा पनि इजरायली प्रहार भएको जनाइएको छ। लेबनानको राजधानी आसपासका केही स्थानहरू लक्षित गरिएको बताइएको छ। घटनापछि त्यहाँ सुरक्षा सतर्कता बढाइएको छ।

लगातार भइरहेका यी घटनाले सम्पूर्ण मध्यपूर्व क्षेत्रमा तनाव उच्च बनेको छ। अन्तर्राष्ट्रिय समुदायले संयमता अपनाउन र वार्तामार्फत समाधान खोज्न आग्रह गरेका छन्। हवाई सेवा, कूटनीतिक गतिविधि र ऊर्जा आपूर्तिमा समेत यसको प्रभाव देखिन थालेको छ।