इरान । अमेरिकी राष्ट्रपति डोनाल्ड ट्रम्पले इरानका नयाँ सर्वोच्च नेता मोज्तबा खामेनी जीवित छन् वा छैनन् भन्ने विषयमा शंका व्यक्त गरेका छन्।

शनिबार एक अन्तर्वार्ताका क्रममा ट्रम्पले मोज्तबा खामेनीको अवस्थाबारे प्रश्न उठाएका हुन्। मोज्तबा खामेनी मारिएका पूर्व नेता आयतोल्लाह अली खामेनीका छोरा हुन्।

ट्रम्पले भने, “मलाई थाहा छैन उनी जीवित छन् कि छैनन्। अहिलेसम्म कसैले पनि उनलाई सार्वजनिक रूपमा देखाउन सकेको छैन।”उनका अनुसार बिहीबार खामेनीले आफ्नो पहिलो आधिकारिक वक्तव्य क्यामेरा अगाडि बोलेर दिनुको सट्टा लिखित रूपमा मात्र जारी गरेका थिए, जसका कारण उनको अवस्थाबारे थप शंका उत्पन्न भएको उनले बताएका छन्।

ट्रम्पले भने, “मैले सुन्दैछु कि उनी जीवित छैनन्, र यदि जीवितै छन् भने उनले आफ्नो देशका लागि एउटा धेरै बुद्धिमानी काम गर्नुपर्छ, र त्यो आत्मसमर्पण हो।”

यद्यपि, ट्रम्पले खामेनीको मृत्युको चर्चा अहिलेका लागि ‘हल्ला’ मात्र हुन सक्ने पनि बताएका छन्।