प्योङयाङ । चिनियाँ राष्ट्रपति सी जिनपिङ सात वर्षपछि पहिलो पटक उत्तर कोरियाको राजधानी प्योङयाङ पुग्नुभएको छ। दुईदिने राजकीय भ्रमणका क्रममा उहाँले उत्तर कोरियाली नेता किम जोङ उनसँग द्विपक्षीय सम्बन्ध, आर्थिक सहकार्य र क्षेत्रीय सुरक्षाका विषयमा उच्चस्तरीय वार्ता गर्दै हुनुहुन्छ।

विश्लेषकहरूले यो भ्रमणलाई उत्तर कोरियामाथि चीनको प्रभाव पुनः बलियो बनाउने प्रयासका रूपमा हेरेका छन्। चीन र उत्तर कोरियाले रणनीतिक साझेदारी, आर्थिक सहयोग तथा क्षेत्रीय स्थिरताबारे छलफल गर्ने अपेक्षा गरिएको छ।

हालै उत्तर कोरियाले रुससँग सम्बन्ध विस्तार गरेपछि चीन–उत्तर कोरिया सम्बन्धबारे प्रश्न उठिरहेका बेला सीको भ्रमणलाई बेइजिङले आफ्नो परम्परागत प्रभाव पुनः सुदृढ गर्न खोजेको संकेतका रूपमा हेरिएको छ। साथै, उत्तर कोरियाको आणविक कार्यक्रम र उत्तरपूर्वी एसियाको बदलिँदो शक्ति सन्तुलन पनि वार्ताका प्रमुख विषय रहने अनुमान गरिएको छ।