काठमाडौं । चालु आर्थिक वर्षको पहिलो ११ महिनामा नेपालको वस्तु आयात र निर्यात दुवै बढेका छन्। तर आयातको वृद्धि दर उच्च रहँदा व्यापार घाटा पनि उल्लेख्य रूपमा विस्तार भएको छ।

भन्सार विभागले सार्वजनिक गरेको पछिल्लो तथ्यांकअनुसार साउनदेखि जेठसम्म नेपालले १८ खर्ब ९४ अर्ब ९ करोड रुपैयाँभन्दा बढीको वस्तु आयात गरेको छ। यो रकम गत आर्थिक वर्षको सोही अवधिको तुलनामा १५.१६ प्रतिशतले बढी हो।

यस्तै, सोही अवधिमा नेपालबाट २ खर्ब ७७ अर्ब ९६ करोड रुपैयाँ बराबरको वस्तु निर्यात भएको छ। निर्यातमा पनि सुधार देखिएर अघिल्लो वर्षको तुलनामा १२.२८ प्रतिशत वृद्धि भएको विभागले जनाएको छ। गत वर्षको यही अवधिमा २ खर्ब ४७ अर्ब ५७ करोड रुपैयाँ बराबरको वस्तु विदेश निर्यात गरिएको थियो।

आयात र निर्यात दुवै बढे पनि आयातको विस्तार तुलनात्मक रूपमा बढी भएकाले नेपालको वैदेशिक व्यापार घाटा १५.६७ प्रतिशतले वृद्धि भएको छ।

तथ्यांकअनुसार चालु आर्थिक वर्षमा नेपालले सबैभन्दा बढी डिजेल आयात गरेको छ। ११ महिनाको अवधिमा १ खर्ब ५२ अर्ब ६७ करोड रुपैयाँभन्दा बढीको डिजेल विदेशबाट भित्रिएको छ। दोस्रो स्थानमा सोयाबिन तेल तथा त्यसको कच्चा पदार्थ रहेको छ, जसको आयात मूल्य १ खर्ब १९ अर्ब ६३ करोड रुपैयाँ नाघेको छ।

निर्याततर्फ भने सोयाबिन तेल तथा त्यससम्बन्धी कच्चा पदार्थ प्रमुख निर्यातयोग्य वस्तु बनेको छ। समीक्षा अवधिमा यी वस्तुको निर्यात १ खर्ब १३ अर्ब रुपैयाँ पुगेको छ। त्यसपछि अलैँची प्रमुख निर्यात वस्तुका रूपमा रहेको छ, जसको निर्यात मूल्य १२ अर्ब १ करोड रुपैयाँभन्दा बढी रहेको विभागले जनाएको छ।