काठमाडौं । साताको तेस्रो कारोबार दिन मंगलबार नेपाल स्टक एक्सचेन्ज (नेप्से) परिसूचक दोहोरो अंकले घटेको छ। बजार परिसूचक २६.१६ अंकले ओरालो लाग्दै २६७४.४८ विन्दुमा झरेको हो।

बजारमा व्यापक बिक्री दबाब देखिँदा अधिकांश कम्पनीको सेयर मूल्य घटेको छ। कारोबार भएका कम्पनीमध्ये २२ कम्पनीको सेयर मूल्य बढ्दा २३९ कम्पनीको मूल्यमा गिरावट आएको छ। ११ कम्पनीको सेयर मूल्य भने स्थिर रहेको नेप्सेले जनाएको छ।

यस दिन कुल ४ अर्ब ३६ करोड २१ लाख रुपैयाँभन्दा बढीको कारोबार भएको छ। एक करोड ४० हजार १६४ कित्ता सेयर ७२ हजार ८५४ पटक किनबेच भएका छन्।

गिरावटको बजारमा पनि केही कम्पनीले उल्लेख्य लाभ कमाएका छन्। टक्सार पिखुवाखोला हाइड्रोपावर र याम्बलिङ हाइड्रोपावरको सेयर मूल्य १५ प्रतिशतले वृद्धि भएको छ। त्यसैगरी लक्ष्मी उन्नति कोष, सिद्धार्थ इन्भेस्टमेन्ट ग्रोथ स्किम तथा सनराइज ब्लुचिप फन्ड उच्च प्रतिफल दिने कम्पनी तथा योजनाको सूचीमा परेका छन्।

समूहगत प्रदर्शनतर्फ म्युचुअल फन्ड समूह बाहेक सबै उपसूचक राताम्मे देखिएका छन्। अधिकांश क्षेत्रको सूचक घटेसँगै समग्र बजार परिसूचकमा पनि दबाब परेको हो।

लगानीकर्ताबीच नाफा सुरक्षित गर्ने प्रवृत्ति बढ्नु र अधिकांश क्षेत्रमा बिक्रीकर्ता हाबी हुँदा मंगलबारको कारोबारमा बजारले नकारात्मक दिशा लिएको विश्लेषकहरू बताउँछन्।