काठमाडौं । फिफा विश्वकप २०२६ अन्तर्गत समूह ‘एच’ को अन्तिम खेलमा स्पेनले उरुग्वेलाई १–० ले पराजित गर्दै नकआउट चरणमा प्रवेश गरेको छ। यस जितसँगै स्पेनले ७ अंक जोड्दै समूह विजेताको रूपमा अन्तिम ३२ मा स्थान बनायो।

दुई पूर्व विश्वकप विजेताबीच भएको प्रतिस्पर्धात्मक खेलमा उरुग्वेलाई अर्को चरण पुग्न जित अपरिहार्य थियो। समूहको अर्को खेलको नतिजा अनुकूल भए बराबरीले पनि सम्भावना रहन सक्थ्यो, तर स्पेनसँगको हारले उरुग्वेको यात्रा समूह चरणमै टुंगियो।

स्पेनका लागि एलेक्स बाएनाले पहिलो हाफको ४२औँ मिनेटमा मार्कोस लोरेन्टेको पासलाई सदुपयोग गर्दै निर्णायक गोल गरे। त्यसपछि दुवै टोलीले केही अवसर सिर्जना गरे पनि थप गोल हुन सकेन।

दोस्रो हाफमा उरुग्वेले बराबरी गोलका लागि लगातार दबाब बनाए पनि स्पेनको रक्षापंक्ति मजबुत रह्यो। खेलको ८६औँ मिनेटमा फेरान टोरेसको शक्तिशाली प्रहार क्रसबारमा लागेर फर्किँदा स्पेन दोस्रो गोलबाट वञ्चित भयो।

समूहको अर्को खेलमा केप भर्डे र साउदी अरेबियाबीच गोलरहित बराबरी भएपछि केप भर्डे ३ अंकसहित समूह उपविजेता बन्दै आफ्नो पहिलो विश्वकपमै नकआउट चरणमा पुग्न सफल भयो। उरुग्वे भने दुई बराबरी, एक हार र २ अंकसहित तेस्रो स्थानमा सीमित रहँदै प्रतियोगिताबाट बाहिरियो।