काठमाडौं। युक्रेनले रुसको तातारस्तान गणतन्त्रस्थित निजनेकाम्स्क सहरमा गरेको ड्रोन आक्रमणमा कम्तीमा १३ जनाको मृत्यु भएको छ। मृत्यु हुनेमा एक बालकसमेत रहेको रुसी अधिकारीहरूले बताएका छन्।

आक्रमणमा थप ७५ जना घाइते भएको रुसी अधिकारीहरूले जनाएका छन्। यो आक्रमण युक्रेनमा रुसले पूर्णस्तरीय युद्ध सुरु गरेयताका रुसमाथि भएका सबैभन्दा घातक एकल आक्रमणमध्ये एक भएको बताइएको छ।

युक्रेनको सीमाबाट करिब १ हजार १०० किलोमिटर टाढा रहेको निजनेकाम्स्कमा भएको आक्रमणबारे युक्रेनी पक्षले तत्काल आधिकारिक प्रतिक्रिया दिएको छैन। यद्यपि, युक्रेनी सशस्त्र बलले निजनेकाम्स्कस्थित तानेको तेल प्रशोधन केन्द्रमा आक्रमण भएको पुष्टि गरेको छ।

युक्रेनी रक्षा प्रविधि निर्माता कम्पनी फायरपोइन्टले आक्रमणमा आफ्नो एफपी–१ ड्रोन प्रयोग गरिएको जनाएको छ।

स्थानीय स्रोतका अनुसार रातिदेखि बिहानसम्म कैयौँ घण्टा आक्रमण जारी रहेको थियो। सामाजिक सञ्जालमा सार्वजनिक भएका र प्रमाणीकरण गरिएका तस्बिर तथा भिडियोमा दिउँसोको समयमा आकाशतर्फ ठूलो धुवाँ र आगोको मुस्लो उठिरहेको देखिन्छ। पृष्ठभूमिमा हवाई आक्रमणको साइरन बजिरहेको सुनिन्छ।

आक्रमणको मुख्य लक्ष्यबारे रुसले अहिलेसम्म औपचारिक जानकारी दिएको छैन। पछिल्लो समय युक्रेनले रुसको युद्धका लागि आम्दानी तथा सैन्य रसदमा योगदान गर्ने संरचनालाई लक्षित गर्दै लामो दूरीका आक्रमण तीव्र बनाउँदै आएको छ।

रुसले भने औद्योगिक संरचनासँगै आवासीय क्षेत्रमा समेत आक्रमण भएको जनाएको छ। रुसी अनुसन्धान समितिका अनुसार आक्रमणका क्रममा कुनै सैन्य गतिविधिमा संलग्न नरहेका सर्वसाधारणसमेत प्रभावित भएका छन्। यी दाबीको स्वतन्त्र पुष्टि भने हुन सकेको छैन।

तातारस्तानका प्रमुख रुस्ताम मिनिखानोभले आक्रमणको पुष्टि गर्दै मृतकका परिवारप्रति समवेदना व्यक्त गरेका छन्। निजनेकाम्स्कका मेयर रादमिर बेलायेभले घटनाप्रति दुःख व्यक्त गर्दै यो सबैका लागि ठूलो पीडा भएको बताएका छन्।

घटनापछि तातारस्तानमा शोक अवधि घोषणा गरिएको छ।

यसअघि पनि युक्रेनी सेनाले जुन १२ मा निजनेकाम्स्कस्थित तेल प्रशोधन केन्द्रलाई लक्षित गरी आक्रमण गरेको थियो।

रुसले रातभरमा ४५० भन्दा बढी युक्रेनी ड्रोन आफ्नो वायु रक्षा प्रणालीले खसालेको दाबी गरेको छ।

पछिल्लो समय युक्रेनले रुसभित्र लामो दूरीका ड्रोन आक्रमण गर्ने क्षमता बढाउँदै गएको छ। यस्ता आक्रमणमा प्रायः गोदाम, ऊर्जा संरचना तथा युद्धसँग सम्बन्धित पूर्वाधारलाई लक्षित गरिँदै आएको छ। यस क्रममा सर्वसाधारणको हताहतीसमेत बढिरहेको छ।

उता, रुसले पनि युक्रेनका सहर तथा आवासीय क्षेत्रमा नियमित रूपमा ठूलो संख्यामा ड्रोन र क्षेप्यास्त्र आक्रमण गर्दै आएको छ। गत साता राजधानी किभमा भएको संयुक्त ड्रोन तथा क्षेप्यास्त्र आक्रमणमा २१ जनाको मृत्यु भएको थियो।