काठमाडौं । आज हरितालिका तीज। नेपाली हिन्दू महिलाहरूको प्रमुख पर्वका रूपमा मनाइने तीजका अवसरमा काठमाडौंको पशुपतिनाथ मन्दिरमा बिहानैदेखि भक्तजनको घुइँचो लागेको छ।

तीजको व्रत बसेका महिला तथा श्रद्धालुहरू बिहानैदेखि पशुपतिनाथ पुगेर भगवान् शिवको पूजा–आराधना र दर्शन गरिरहेका छन्। रातो पहिरन र गरगहनामा सजिएका महिलाहरूको बाक्लो उपस्थितिले पशुपति क्षेत्र तीजमय बनेको छ।

पशुपतिनाथ मन्दिरमा दर्शन तथा पूजाका लागि आउने भक्तजनको चापलाई मध्यनजर गर्दै आवश्यक व्यवस्थापन गरिएको छ। भक्तजनलाई सहज रूपमा दर्शन गराउन मन्दिरका ढोकाहरू खुला राखिएको छ भने सुरक्षा व्यवस्था पनि कडा पारिएको छ।

तीजका दिन महिलाहरूले आफ्नो धार्मिक तथा सांस्कृतिक परम्पराअनुसार व्रत बसेर भगवान् शिवको पूजा गर्ने गर्छन्। विवाहित महिलाले श्रीमान्को दीर्घायु, सुख–शान्ति र पारिवारिक समृद्धिको कामना गर्दै व्रत बस्ने तथा अविवाहित महिलाले योग्य जीवनसाथीको कामना गर्ने धार्मिक विश्वास छ।

पशुपतिनाथमा दर्शनका लागि काठमाडौं उपत्यका तथा देशका विभिन्न स्थानबाट भक्तजन आएका छन्। बिहानैदेखि पशुपति क्षेत्रमा महिलाहरूको चहलपहल बढेपछि आसपासका सडक तथा बजार क्षेत्रमा समेत भीडभाड बढेको छ।

तीज केवल धार्मिक पर्वमा सीमित नभई नेपाली महिलाको मौलिक सांस्कृतिक पर्वका रूपमा समेत स्थापित छ। माइती जाने, दिदीबहिनी तथा आफन्तसँग भेटघाट गर्ने, दर खाने र सामूहिक रूपमा तीजका गीत तथा नृत्यमा रमाउने परम्परा यस पर्वसँग जोडिएको छ।

पछिल्ला वर्षहरूमा तीज मनाउने शैलीमा परिवर्तन आए पनि यसको धार्मिक तथा सांस्कृतिक महत्त्व भने कायमै छ। आज देशभरका विभिन्न शिवालय तथा शक्तिपीठमा समेत भक्तजनको उल्लेख्य चहलपहल देखिएको छ।