काठमाडौँ । ब्राजिलियन फरवार्ड राफिन्हाले लगातार दोस्रो खेलमा ह्याट्रिक गरेपछि बार्सिलोनाले स्पेनिस ला लिगामा सेभियालाई ३–१ गोलले पराजित गरेको छ।

सेभियाको घरेलु मैदान रामोन सान्चेज पिज्जुआन रंगशालामा भएको खेलमा सुरुआती अग्रता भने घरेलु टोलीले लिएको थियो। खेलको १९औँ मिनेटमा फेलिक्स कोरेयाको क्रसमा युसुफ फोफानाले हेडमार्फत गोल गर्दै सेभियालाई १–० को अग्रता दिलाएका थिए।

तर तीन मिनेटमै राफिन्हाले गोल गर्दै बार्सिलोनालाई खेलमा फर्काए। दोस्रो हाफमा बार्सिलोनाका युवा स्टार लामिन यमाल र राफिन्हाको संयोजन निर्णायक बन्यो।

खेलको ५२औँ मिनेटमा यमालको उत्कृष्ट क्रसलाई राफिन्हाले हेडमार्फत गोल गर्दै बार्सिलोनालाई २–१ को अग्रता दिलाए। त्यसपछि ६९औँ मिनेटमा यमालकै उत्कृष्ट पासमा राफिन्हाले गोलरक्षकलाई छक्याउँदै गोल गरेपछि आफ्नो ह्याट्रिक पूरा गरे।

योसँगै राफिन्हाले लगातार दोस्रो खेलमा ह्याट्रिक गरेका छन्। यसअघि उनले रेसिङ सान्टान्डरविरुद्ध बार्सिलोनाको ७–२ को जितमा पनि तीन गोल गरेका थिए। जारी सिजन उत्कृष्ट लयमा रहेका २९ वर्षीय राफिन्हाको सबै प्रतियोगितामा गोल सङ्ख्या १४ पुगेको छ।

सेभियाविरुद्धको जितसँगै बार्सिलोनाले ला लिगामा लगातार सातौँ तथा सबै प्रतियोगितामा लगातार आठौँ जित हात पारेको छ। आठ खेलबाट २१ अंक जोडेको बार्सिलोना तालिकाको शीर्ष स्थानमा छ।