काठमाडौं । यमनका हुथी विद्रोहीले साउदी अरेबियाको राजधानी रियादस्थित साउदी अरामकोको तेल पूर्वाधारलाई निशाना बनाएर आक्रमण गरेको दाबी गरेका छन्।

विद्रोहीका अनुसार शनिबार गरिएको आक्रमणमा ब्यालिस्टिक क्षेप्यास्त्र र ड्रोन प्रयोग गरिएको थियो। यमनको राजधानी साना र अन्य क्षेत्रमा साउदी अरेबियाले गरेको सैन्य कारबाहीको जवाफस्वरूप आक्रमण गरिएको उनीहरूको भनाइ छ।

शनिबार बिहान रियादमा रहेको अरामकोको तेल पूर्वाधारनजिक धुवाँ र आगो देखिएको एक प्रत्यक्षदर्शीले बताएका थिए। घटनापछि साउदी अरेबियाको महत्त्वपूर्ण तेल संरचनाको सुरक्षा र सम्भावित क्षतिबारे चासो बढेको छ।

तर, साउदी अरेबियाका अधिकारीहरूले उक्त पूर्वाधारमा आक्रमण भएको विषयमा औपचारिक पुष्टि गरेका छैनन्। साउदी अरामकोले पनि घटनाबारे तत्काल कुनै प्रतिक्रिया सार्वजनिक गरेको छैन।

हुथी विद्रोहीको दाबी स्वतन्त्र रूपमा पुष्टि हुन बाँकी रहेकाले आक्रमणबाट भएको सम्भावित क्षति र घटनाको वास्तविक अवस्थाबारे स्पष्ट विवरण प्राप्त भएको छैन।