काठमाडौं । नेपाली कांग्रेसको संस्थापनइतर समूहले सातै प्रदेशमा भेला आयोजना गर्ने निर्णय गरेको छ। पार्टीभित्रको असन्तुष्टि समाधान र एकताको प्रयासस्वरूप संस्थापन पक्षले संवाद अघि बढाइरहेका बेला इतर समूहले आफ्नो धारणा तय गर्न प्रदेशस्तरीय छलफल गर्न लागेको हो।

भेलाका लागि विभिन्न मिति निर्धारण गरिएको छ। एक नेताका अनुसार, बैठकहरूमा पार्टी एकताको प्रस्ताव, क्रियाशील सदस्यता अद्यावधिक तथा ‘जरा अभियान’ लगायतका विषयमा विस्तृत छलफल हुनेछ। भेलाको संयोजन सम्बन्धित प्रदेशका अनुभवी नेताहरूले गर्ने जनाइएको छ।

यसअघि वैशाख १८ गते पूर्वसभापति शेरबहादुर देउवा र तत्कालीन उपसभापति पूर्णबहादुर खड्का निकट समूहको भेलाले क्रियाशील सदस्यता अद्यावधिक र जरा अभियानप्रति असहमति जनाउँदै प्रदेशगत जिम्मेवारी बाँडफाँट गरेको थियो।

देउवा पक्ष हाल पार्टी नेतृत्वले अघि बढाएको सदस्यता अद्यावधिक अभियान र जरा अभियानमा सहभागी भएको छैन। उक्त समूहको तर्क अनुसार वर्तमान सभापति गगन थापा महामन्त्री रहेका बेला नै सदस्यता नवीकरण सम्पन्न भइसकेकाले पुनः अद्यावधिक आवश्यक नरहेको बताइएको छ।