काठमाडौं । प्रधानमन्त्री वालेन्द्र शाहले नेपाल–भारत सीमा विवादलाई आपसी संवाद र कूटनीतिक माध्यमबाट समाधान गर्ने सरकारको नीति रहेको बताएका छन्। प्रतिनिधिसभाको आइतबारको बैठकमा सांसद आरेन राईले लिपुलेक, लिम्पियाधुरा र कालापानीलगायत विवादित क्षेत्रबारे सरकारको धारणा सोधेपछि प्रधानमन्त्रीले यस्तो बताएका हुन्।

जवाफ दिने क्रममा प्रधानमन्त्री शाहले सीमा विवाद एकपक्षीय नभएको उल्लेख गर्दै नेपालले मात्र नभई भारतले पनि सीमा सम्बन्धी विषयमा दुवै पक्षले अध्ययन गर्नुपर्ने अवस्था रहेको बताए। उनले प्रधानमन्त्री बनेपछि प्राप्त जानकारीअनुसार नेपालले पनि केही स्थानमा भारतीय भूभाग अतिक्रमण गरेको तथ्य आफूले थाहा पाएको बताए।

“हालै प्राप्त विवरणअनुसार सीमा क्षेत्रमा दुवै देशका तर्फबाट अतिक्रमणका विषयहरू देखिएका छन्,” प्रधानमन्त्रीले भने, “यस विषयमा दुवै देशले तथ्यगत अध्ययन गरी कहाँ कसको दाबी उचित छ भन्ने स्पष्ट पार्दै मित्रवत् वातावरणमा समाधान खोज्नुपर्छ।”

उनले नेपाल र भारतबीचको सीमा समस्या संवेदनशील विषय भएकाले भावनात्मकभन्दा पनि तथ्य र संवादका आधारमा निष्कर्षमा पुग्नुपर्ने धारणा व्यक्त गरे। प्रधानमन्त्रीका अनुसार दुवै मुलुकले सहकार्य र आपसी समझदारीका साथ सीमा विवादको दीर्घकालीन समाधान खोज्ने प्रयास गरिरहेका छन्।