काठमाडौं । फिफा विश्वकप २०२६ को उद्घाटन खेलमा सहआयोजक मेक्सिकोले विजयी सुरुवात गरेको छ। मेक्सिको सिटीस्थित ऐतिहासिक तथा प्रतिष्ठित एज्टेका रंगशालामा सम्पन्न खेलमा घरेलु टोलीले दक्षिण अफ्रिकालाई २–० ले पराजित गर्दै प्रतियोगितामा सुखद सुरुवात गरेको हो।

विश्वकपका तीन फरक संस्करणका खेल आयोजना गर्ने विश्वकै पहिलो रंगशालाको कीर्तिमान बनाएको एज्टेका रंगशालामा करिब ८० हजार दर्शकको उल्लेखनीय उपस्थिति रहेको थियो। मेक्सिकोको जितमा जुलियन क्विनोनेस र अनुभवी फरवार्ड राउल जिमेनेजले एक–एक गोल गरे।

खेल निकै प्रतिस्पर्धात्मक र केही तनावपूर्ण बनेको थियो। ब्राजिलियन रेफ्रीले खेलभर तीनवटा रातो कार्ड देखाएका थिए।

मेक्सिकोले सुरुआतदेखि नै आक्रामक खेल प्रस्तुत गर्दै नवौं मिनेटमै अग्रता लिएको थियो। दक्षिण अफ्रिकाका गोलरक्षक रोनवेन विलियम्सले दिएको बललाई रक्षकले नियन्त्रणमा लिन नसक्दा इरिक लिराले उपलब्ध गराएको पासलाई जुलियन क्विनोनेसले उत्कृष्ट फिनिसिङ गर्दै टोलीलाई १–० को अग्रता दिलाए।

चौथो मिनेटमै राउल जिमेनेजको प्रहारलाई गोलरक्षक विलियम्सले उत्कृष्ट बचाउ गरेका थिए। ४२औं मिनेटमा जुलियन क्विनोनेसको अर्को प्रहार गोलपोस्टमा लागेर फर्किएको थियो। यसबाहेक पनि मेक्सिकोले केही राम्रो अवसरलाई गोलमा परिणत गर्न सकेन।

खेलको ५०औं मिनेटमा याया सिथोलेले रातो कार्ड पाएपछि दक्षिण अफ्रिका १० खेलाडीमा सीमित भयो। ब्रायन गुटिरेजलाई पेनाल्टी क्षेत्रबाहिर लास्ट म्यानको रूपमा फाउल गरेपछि रेफ्रीले सिथोलेलाई सिधै रातो कार्ड देखाएका थिए।

मेक्सिकोले ६७औं मिनेटमा अग्रता दोब्बर बनायो। रोबर्टो अल्भाराडोको उत्कृष्ट क्रसमा राउल जिमेनेजले हेडमार्फत गोल गर्दै टोलीलाई २–० को बलियो अवस्थामा पुर्‍याए।

८४औं मिनेटमा थेम्बा ज्वानेले विपक्षी खेलाडीलाई हातले प्रहार गरेको घटनालाई भीएआरमार्फत समीक्षा गर्दै रेफ्रीले उनलाई रातो कार्ड देखाएपछि दक्षिण अफ्रिका नौ खेलाडीमा झरेको थियो।

इन्जुरी समयको पहिलो मिनेटमा मेक्सिकोका सेजार मोन्टेसले स्पष्ट गोल अवसरलाई रोक्ने क्रममा फाउल गरेपछि सिधै रातो कार्ड पाए र मेक्सिको पनि १० खेलाडीमा सीमित भएको थियो।

उद्घाटन खेलमा प्रभावशाली प्रदर्शन गरेको मेक्सिकोले महत्वपूर्ण तीन अंक हासिल गरेको छ।