चितवन । राष्ट्रिय स्वतन्त्र पार्टी (रास्वपा) को जारी महाधिवेशनमा मतदान प्रक्रियालाई थप प्रभावकारी, पारदर्शी र छिटो बनाउन डिजिटल प्रविधिको व्यापक प्रयोग गरिएको छ। मतदानका लागि प्रयोग हुने भोटिङ मेसिनमा उम्मेदवारहरूको विवरण प्रविष्ट गर्ने समय यसपटक उल्लेखनीय रूपमा घटेको प्राविधिक टोलीले जनाएको छ।

अघिल्ला निर्वाचन तथा महाधिवेशनहरूमा उम्मेदवारको नाम इन्ट्री गर्न करिब १५ घण्टासम्म लाग्ने गरेकोमा अहिले प्रविधिगत सुधार र व्यवस्थापनको सहजताका कारण उक्त प्रक्रिया करिब ६ घण्टामै सम्पन्न गर्न सकिने भएको छ।

हाल प्राविधिक टोली निर्वाचन समितिबाट प्राप्त हुने अन्तिम उम्मेदवार सूचीको प्रतीक्षामा छ। अन्तिम नामावली प्राप्त भएपछि भोटिङ मेसिनमा आवश्यक विवरण प्रविष्ट गर्ने काम सुरु गरिनेछ।

मतदानलाई व्यवस्थित बनाउन महाधिवेशन स्थलमा ८० वटा भोटिङ मेसिन तयारी अवस्थामा राखिएको छ। पार्टीको ९९ सदस्यीय केन्द्रीय कार्यसमिति चयनका लागि देशभरबाट ४०० भन्दा बढी नेताकार्यकर्ताले उम्मेदवारी दर्ता गराएका छन्, जसले प्रतिस्पर्धालाई थप रोचक बनाएको छ।

निर्वाचन समितिले प्रारम्भिक उम्मेदवार सूची सार्वजनिक गर्ने तयारी गरिरहेको छ। त्यसपछि दाबी–विरोधका लागि समय दिइनेछ र आवश्यक छानबिन तथा प्रक्रिया पूरा भएपछि अन्तिम नामावली प्रकाशित गरिनेछ।

अन्तिम सूची भोटिङ मेसिनमा अद्यावधिक भएसँगै डिजिटल माध्यमबाट मतदान सुरु हुनेछ। रास्वपाले महाधिवेशनलाई आधुनिक, पारदर्शी र समयमै सम्पन्न गर्ने उद्देश्यसहित प्रविधिमैत्री मतदान प्रणालीलाई प्राथमिकता दिएको जनाएको छ।

प्रतिनिधिहरूले पनि नाम इन्ट्री प्रक्रियामा आएको सुधारले मतदान तालिका प्रभावित नहुने र नतिजा समयमै सार्वजनिक हुने अपेक्षा व्यक्त गरेका छन्।