काठमाडौं । अमेरिका र साउदी अरबबीच नागरिक प्रयोजनका लागि आणविक ऊर्जा क्षेत्रमा सहकार्य गर्ने महत्वपूर्ण सम्झौतामा हस्ताक्षर भएको छ। अमेरिकी राष्ट्रपति डोनाल्ड ट्रम्प प्रशासनले बुधबार सम्झौताको घोषणा गरेको हो।

अमेरिकी ऊर्जा मन्त्री क्रिस राइट र साउदीका ऊर्जा मन्त्री राजकुमार अब्दुलअजिज बिन सलमानले सम्झौतामा हस्ताक्षर गरेका छन्। दुवै देशले आणविक सुरक्षा र प्रसार रोकथामसम्बन्धी छुट्टै सहमतिमा पनि हस्ताक्षर गरेका छन्।

सम्झौताअनुसार भविष्यमा साउदी अरबलाई आफ्नै भूमिमा आणविक रियाक्टरका लागि आवश्यक इन्धन उत्पादन गर्ने बाटो खुल्न सक्नेछ। यद्यपि त्यसअघि दुवै देशले युरेनियम समृद्धीकरण आर्थिक रूपमा सम्भव छ वा छैन भन्ने विषयमा संयुक्त अध्ययन गर्नेछन्।

यो सम्झौता अब अमेरिकी कंग्रेसको अनुमोदनका लागि जानेछ। अमेरिकी अधिकारीहरूले यसले शान्तिपूर्ण आणविक ऊर्जा विकासमा सहयोग पुग्ने बताएका छन् भने केही सुरक्षा विश्लेषकहरूले मध्यपूर्वमा आणविक हतियारको प्रतिस्पर्धा बढ्न सक्ने जोखिम रहेको भन्दै चिन्ता व्यक्त गरेका छन्। साउदीले भने सम्झौता पूर्ण रूपमा शान्तिपूर्ण ऊर्जा विकासका लागि भएको स्पष्ट पारेको छ।