काठमाडौं । रसुवाको भोटेकोशीमा आएको विनाशकारी बाढीपछि प्रभावित क्षेत्रमा खोज तथा उद्धार कार्य जारी रहेको छ। नेपाल प्रहरीले भदौ ३० गते बिहान ८ बजेसम्मको विवरण सार्वजनिक गर्दै बाढीपछि ४ हजार ८९ जना अझै बेपत्ता रहेको जनाएको छ।

प्रहरीका अनुसार बेपत्ता हुनेमध्ये ३ हजार ४७९ जना नेपाली नागरिक छन्, जसमा २ हजार ९०७ पुरुष र ५७२ महिला रहेका छन्। त्यस्तै ६१० जना विदेशी नागरिक बेपत्ता छन्। उनीहरूमध्ये २७२ पुरुष, ३८ महिला र १० जनाको विवरण अन्य समूहमा राखिएको छ।

बाढी प्रभावित क्षेत्रबाट हालसम्म ९ हजार २८७ जनाको सकुशल उद्धार गरिएको प्रहरीले जनाएको छ। उद्धार गरिएकामध्ये ६ हजार ४०७ पुरुष, २ हजार ८३० महिला र ५० जना पहिचान नखुलेका व्यक्ति रहेका छन्।

खोज तथा उद्धारका लागि प्रभावित क्षेत्रमा ७ हजार ९७५ जना प्रहरी जनशक्ति परिचालन गरिएको छ। बाढीका कारण ६५ जना प्रहरीसमेत प्रभावित भएका छन् भने २५ जना प्रहरी अझै सम्पर्कविहीन रहेको जनाइएको छ।

प्रहरीका अनुसार हालसम्म १ हजार ३९९ वटा शव तथा मानव शरीरका आंशिक अंग फेला परेका छन्। फेला परेकामध्ये ५४४ पुरुष र ३३६ महिला रहेका छन् भने ५१९ वटा मानव शरीरका आंशिक अंग रहेका छन्। अहिलेसम्म १०३ वटा शव आफन्तलाई बुझाइएको छ भने १ हजार २३० वटा शव सुरक्षित रूपमा व्यवस्थापन गरिएको प्रहरीले जनाएको छ।

पहिचान हुन नसकेका १ हजार ३५५ वटा शवको विवरण प्रहरीले आफ्नो वेबसाइटमा सार्वजनिक गरेको छ। शव तथा मानव अंगको पहिचानका लागि डीएनए परीक्षण प्रक्रिया पनि अघि बढाइएको छ। हालसम्म शवबाट १ हजार २८६ र बेपत्ता व्यक्तिका आफन्तबाट १ हजार ८८९ गरी कुल ३ हजार १७५ वटा डीएनए नमुना संकलन गरिएको छ।

उद्धार गरिएका व्यक्तिमध्ये ३ हजार ८८० जनालाई हाल होल्डिङ सेन्टरमा राखिएको छ। प्रभावित क्षेत्रमा प्रहरीले जनचेतना अभिवृद्धिका लागि २०१ वटा कार्यक्रम सञ्चालन गरेको छ, जसमा ४७ हजार ९२६ जना सहभागी भएको प्रहरीले जनाएको छ।