काठमाडौं । नेपाल प्रिमियर लिग (एनपीएल) को तेस्रो संस्करणको उद्घाटन खेलमा साविक विजेता लुम्बिनी लायन्सले साविक उपविजेता सुदूरपश्चिम रोयल्सलाई ७ विकेटले पराजित गरेको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा सोमबार भएको खेलमा सुदूरपश्चिमले दिएको ८८ रनको लक्ष्य लुम्बिनीले ९.५ ओभरमा तीन विकेट गुमाएर पूरा गर्‍यो ।

लुम्बिनीको जितमा डार्सी सर्टले आक्रामक ब्याटिङ गर्दै १८ बलमा ४० रन बनाए । उनले चार चौका र तीन छक्का प्रहार गरे । त्यस्तै, आशिफ शेखले २५ बलमा दुई चौका र दुई छक्काको मद्दतमा ३२ रन जोडे ।

सुदूरपश्चिम ८७ रनमै समेटियो

टस हारेर पहिले ब्याटिङ गरेको सुदूरपश्चिम १७.२ ओभरमा ८७ रनमै अलआउट भयो ।

टोलीका कप्तान दीपेन्द्रसिंह ऐरीले सर्वाधिक २७ रन बनाए । उनले २३ बलमा दुई चौका प्रहार गरे । अनिल खरेलले २७ बलमा १५ रन जोड्दा ओपनर सैफ जैबले १४ बलमा १३ रन बनाए । अन्य ब्याटरले दोहोरो अंकमा रन बनाउन सकेनन् ।

सुदूरपश्चिमलाई सस्तैमा समेट्ने क्रममा लुम्बिनीका किशोर महतोले सर्वाधिक चार विकेट लिए । शेर मल्लले तीन विकेट हात पारे । शाड्ली भान साल्कविक, कप्तान रोहित पौडेल र तिलक भण्डारीले समान एक विकेट लिए ।

लुम्बिनीका अनिल खरेलले दुई तथा दीपेन्द्रसिंह ऐरीले एक विकेट लिए ।

अघिल्लो फाइनलको नतिजा दोहोरियो

सुदूरपश्चिमको ८७ रनको योगफल अघिल्लो संस्करणको फाइनलमा बनाएको स्कोरभन्दा दुई रन मात्रै बढी हो ।

गत संस्करणको फाइनलमा पहिले ब्याटिङ गरेको सुदूरपश्चिम १९.१ ओभरमा ८५ रनमा समेटिएको थियो । उक्त खेल लुम्बिनीले चार विकेट गुमाएर जितेको थियो ।

तेस्रो संस्करणको पहिलो खेलमा पनि सुदूरपश्चिमले कमजोर ब्याटिङ गरेपछि लुम्बिनीले सहज जित निकाल्दै प्रतियोगितामा विजयी सुरुवात गरेको छ ।

आगामी खेल

सुदूरपश्चिमले आगामी बुधबार पोखरा एभेन्जर्ससँग प्रतिस्पर्धा गर्नेछ । लुम्बिनीले भने आगामी शनिबार चितवन राइनोजको सामना गर्नेछ ।

दीपेन्द्रसिंह ऐरीको कप्तानीमा रहेको सुदूरपश्चिम रोयल्समा सैफ जैब, स्कट कुगेलेइन, ब्रान्डन म्याकमुलेन, विनोद भण्डारी र आरिफ शेखलगायतका खेलाडी छन् ।

त्यस्तै, रोहित पौडेलको कप्तानीमा रहेको लुम्बिनी लायन्समा डार्सी सर्ट, आशिफ शेख, सन्दीप जोरा, रुबेन ट्रम्पलम्यान, शेर मल्ल र किशोर महतोलगायतका खेलाडी छन् ।