काठमाडौं । इंग्ल्यान्डका कप्तान तथा जर्मन क्लब बायर्न म्युनिखका स्टार स्ट्राइकर ह्यारी केनले सन् २०२६ को प्रतिष्ठित बालोन डी’ओर अवार्ड जितेका छन् ।

सोमबार लन्डनमा आयोजित समारोहमा अवार्ड जितेसँगै केनले २५ वर्षपछि इंग्ल्यान्डका खेलाडीलाई फुटबलको सर्वोच्च व्यक्तिगत सम्मान दिलाएका छन् । यसअघि सन् २००१ मा इंग्ल्यान्डका माइकल ओवेनले बालोन डी’ओर जितेका थिए ।

अवार्डको दौडमा रियल मड्रिड तथा फ्रान्सका फरवार्ड किलियन एमबाप्पे दोस्रो र बार्सिलोना तथा स्पेनका युवा स्टार लामिन यामाल तेस्रो स्थानमा रहे ।

३३ वर्षीय केन बालोन डी’ओर जित्ने इंग्ल्यान्डका पाँचौँ खेलाडी बनेका छन् । यसअघि स्टान्ली म्याथ्युजले सन् १९५६, बबी चार्ल्टनले सन् १९६६ तथा केभिन किगनले सन् १९७८ र १९७९ मा यो अवार्ड जितेका थिए ।

यस्तै, बेलायतका अन्य राष्ट्रका खेलाडीमध्ये स्कटल्यान्डका डेनिस लले सन् १९६४ र उत्तर आयरल्यान्डका जर्ज बेस्टले सन् १९६८ मा बालोन डी’ओर जितेका थिए ।

एकै सिजनमा ६१ गोल

बायर्न म्युनिखबाट सन् २०२५–२६ को सिजनमा उत्कृष्ट प्रदर्शन गरेका केनले सबै प्रतियोगितामा ५१ खेल खेल्दै ६१ गोल गरेका थिए । यो बायर्नका कुनै पनि खेलाडीले एकै सिजनमा गरेको सर्वाधिक गोल हो ।

क्लब र इंग्ल्यान्डको राष्ट्रिय टोलीबाट उनले सिजनभर कुल ७३ गोल गरेका थिए ।

केनले जर्मन बुन्डेसलिगामा ३६ गोल गर्दै सर्वाधिक गोलकर्ताको उपाधिसमेत जितेका थिए । त्यस्तै, युरोपेली च्याम्पियन्स लिगमा १४ गोल गर्दै उनले आफ्नो गोल गर्ने क्षमता प्रमाणित गरेका थिए ।

क्लब र राष्ट्रिय टोली दुवैतर्फको प्रभावशाली प्रदर्शनका कारण केनले बालोन डी’ओर जित्दै आफ्नो करिअरमा अर्को ऐतिहासिक उपलब्धि थपेका छन् ।