त्रिशूली । नुवाकोटको विदुर नगरपालिका–९ मा मोटरसाइकल दुर्घटना हुँदा तीन जनाको मृत्यु भएको छ ।

भैरमकोटबाट त्रिशूलीतर्फ आउँदै गरेको बा ९९ प ८२०२ नम्बरको मोटरसाइकल खड्कथोकमा अनियन्त्रित भई सडकबाट करिब १०० मिटर तल खसेको हो ।

दुर्घटनामा गम्भीर घाइते भएका तीनै जनालाई उपचारका लागि त्रिशूली अस्पताल पुर्‍याइएको थियो । तर, चिकित्सकले उनीहरूलाई मृत घोषणा गरेका जिल्ला प्रहरी कार्यालय नुवाकोटका डीएसपी इकबाल हवारीले जानकारी दिए ।

मृत्यु हुनेमा मोटरसाइकल चालक धादिङको खनियाबासका ४७ वर्षीय बुद्धिमान तामाङ तथा विदुर–१३ का २७ वर्षीया सुनिता थापामगर र ३१ वर्षीया बिन्दा थापामगर रहेका छन् ।

प्रहरीका अनुसार उक्त मोटरसाइकलले भाडामा यात्रु ओसारपसार गर्ने गरेको प्रारम्भिक जानकारी प्राप्त भएको छ ।